ယုံ၍ အစားခံရသူများ
သီတာအောင် (ဂျပန်)
ငယ်စဉ်က ပုံပြင်တပုဒ်
ခြင်္သေ့မင်းက ဟန်လုပ်လို့
နာမကျန်းချင်ယောင်ဆောင်
ဥပုဒ်ပါစောင့်တဲ့သတင်း
ဒလန်ကိုမြေခွေးက
တွင်တွင်ကြီးဖြန့်ရင်းပေါ့။
လက်တွေ့သိချင်သူများ
ဂူထဲဝင်လေ့လာပါလားတဲ့
တွေးကြည့်ရုံနဲ့ အဖြေမပေါ်
ဝင်ကြည့်မှတော်မယ်ဆိုသူတို့
အ၀င်ခြေရာသာတွေ့
ဂူတွင်းမှာ အရိုးစုဘ၀နဲ့
မွေ့နေကြရသတဲ့။
ဗိုလ်မောင်အေးနဲ့ ဗိုလ်သန်းရွှေ
ခပ်ခွေခွေနေပြရုံနဲ့
နာတာရှည်ဖျားနေတဲ့
ကျားပေပဲလား
ဥပုဒ်သီတင်းမွေ့တဲ့
ရွှေခြင်္သေ့လေလား
အတွေးဝါးနေကြရင်ဖြင့် ...။
တကြိမ်နှစ်ကြိမ် အလိမ်ခံရတာ
လိမ်ခဲ့သူအမှားထား
ဆင်ခြေပွားလို့ရနိုင်ပေမယ့်
သုံးကြိမ်နဲ့အထက်
အညာခံရမယ့်အချက်ကတော့
ယုံလွယ်သူရာဇ၀င်မြောက်
သမိုင်းမှာ
မလှလောက်ဖူးထင်တယ်နော်။ ။
သီတာအောင် (ဂျပန်)
No comments:
Post a Comment